هالة صدقي: اتطلقت وفقا للشريعة الإسلامية

أكدت الفنانة هالة صدقي، سعادتها بالحكم الصادر من محكمة أسرة قصر النيل بتطليقها من زوجها سامح سامي.

وقالت "صدقي": "أنا معنديش أي مشاعر ولا إحساس، يعني أنا بعتبر أن دي إجراءات ورق، الطلاق الفعلي حصل من 8 سنين لما عرفت أن إحنا استحالت العشرة مع بعض، مضيفة: "فالطلاق نفسيا آه تعبت وقعدت حوالي سنتين أو 3 سنين مش مستوعبة اللي بيحصلي ده، كانت صدمات ورا بعض، لكن أنا خدت الصدمة من 8 سنين مش من دلوقتي، أنا دلوقتي ده إجراءات ورق حصلت حصلت محصلتش مش فارقة معايا".

وتابعت: "لكن طبعا هبقى كذابة لو قولتلك أني مفرحتش، على الأقل أنا اسمي مش على اسم الإنسان ده، لأن أنا لحد آخر لحظة محترمة اسمه في حياتي، يعني عاملة اعتبار إني على اسم راجل، فأنا دلوقتي حتى لو أنا مش هعمل أي حاجة مختلفة عن طبيعة حياتي بس فيه حتة إني مش على اسم الراجل ده".

وعن كيفية حدوث الطلاق، أوضحت: "أنا حاولت بكل الوسائل اللي هو تغيير ملة بس معرفتش الحقيقة وهو راح غير ملة وده ساعدني جدا أن الموضوع يخلص، متابعة: "والطلاق حصل لما هو غير ملته، أنا بس اتطلقت مدني لأني تبع قانون مصر، بتغيير الملة أنا بقيت تبع الشريعة الإسلامية، فأنا متطلقة طبقًا للشريعة الإسلامية".

واستطردت: "هو لما يغير ملة إحنا أوتوماتيك بنبقى تبع الشريعة الإسلامية فنتطلق عادي، احنا اتطلقنا مدني لكن الكنسي لسه، الكنسي أنك تروح الكنيسة والمجني عليه هو اللي بياخد تصريح".

واختتمت هالة صدقي حديثها بأن لها الحق في الزواج لأن زوجها السابق غير الملة رغم عدم حصولها على الطلاق الكنسي، لافتة إلى أن أولادها في عمر الـ 13 عاما وبإتمام الطلاق تم رفع منع السفر عنهما، وجاء ذلك خلال مداخلة هاتفية مع الإعلامي عمرو أديب، ببرنامج "الحكاية"، المُذاع عبر فضائية "mbc مصر"، مساء الأحد.

للمزيد: موقع خليجيون نيوز، للتواصل الاجتماعي تابعنا على خليجيون